Wikipedia

Empress Mine Township, Zimbabwe

Empress Mine Township, Zimbabwe musha unogara voruzhinji, ugere panzvimbo yaimbonzi Salakuhle (Salagushle), [1] muruwa rweZhombe, mudunhu diki reKwekwe, mudunhu guru reMidlands, munyika yeZimbabwe.

Salakuhle inzwi rechiNdebele rinoreva kuti Sara-zvakanaka. Vechichena vainyora panoti Salakuhle vakuti Salagushle [2]

Empress Mine Township inowanikwa 70km necheKuChamhembe kwadziva kuMadokero kweguta guru reKadoma, uyewo 98km KuMaodzanyemba kwakadziva kuMadokero kweguta guru reKwekwe


Mitsetse yakatarwa yakati sambamba yeEmpress Mine Township inoti -18.4622700S; 29.4207880E apa paKirabhu (club) kumaCAMMERA.


Musha uyu wakatanga kuvakwa muna 1968 neEmpress Nickel Mine iyo yaichera dombo rinokosha rinonzi Nickel kusvika pakazovharwa mugodhi uyu muna 1982. [3] [4] [5]


Nzvimbo iyi yakavakwa ine mativi maviri emusha, kunogara veruzhinji (High Density Suburban) nekunogara vashoma (Low Density Suburban). Kwaigara vashoma nanhasi kuchiri kunzi kuma CAMMERA, inzwi raimiririra manzwi aiti 'Cam and Motor Mine European Residential Area' . Kambani yezvemigodhi ine zita rinonzi RioZim nanhasi, ndiyo yaiva varidzi ve 'Cam and Motor Mine' yaiva panzvimbo yavakunzi Effel Flats nhasi neche kuMabvazuva kweguta reKadoma . Iyoyi RioZim yakavambwa nekambanhi yemhiri kwemakungwa inonzi 'Rio Tinto' mugore ra1956, chinangwa chiri chekuchera 'nickel' paSalakuhle, pavakazoti Empress Nickel Mine. Nokudaro misha waigara vachena ku 'Cam and Motor Mine' ku Gatooma ndiyo yaiva nemazita ekuti CAMMERA. Vachena vazhinji vakashanda paEmpress Nickel Mine vaiva vabva ku 'Cam and Motor Mine' , naizvozvo vashandi vavo vemudzimba ndivo vakatakura zita rokuti CAMMERA ndokuuya naro ku 'Empress Nickel Mine' . Nanhasi nzvimbo iyi inongonzi kumaCAMMERA.


KumaCAMMERA uku ndiko kwainzi kuEmpress Mine Township, ukuwo kwaigara veruzhinji kwainzi Mopane Compound Township. Nanhasi vanokuti kuKomboni, zvichireva kuti ku 'Compound Township' .


Nzvimbo iyi yakakura namakore 15 chete kusvika pakuita seguta diki, muchiwanikwa zvose zvaiwanikwa mumaguta mazuva iwayo. Pakazovhara Empress Nickel Mine, musha uyu wakatanga kuva dongo zvokuti nanhasi hausati wanyatsomuka.


Parizvino musha uyu wava pasi peKanzuru yeZRDC 'Zibagwe Rural District Council' uye wava kuratidza kumuka zvishoma nezvishoma.


Mumusha uyu pakati pemaCAMMERA neMopane Township pane chikoro chinodzidzisa varimisi chinonzi RioZim Foundation Zhombe Agricultural College, chaimbonzi Rio Tinto College of Agriculture. [6] Chichitanga mazuva eEmpress Nickel Mine chakanga chiri chokuvaka (Building Centre).


KuMadokero kwemusha uyu kune Dhamu guru rinonzi Ngondoma, riri muRwizi Ngondoma. [7] Dhumu iri rinokwanisa kupa mvura kuEmpress Mine Township yese, neNgondoma Irrigation Scheme pamwechete neColumbina Rural Service Center pasina damudziko. [8]


Empress Mine Township inotarisirwa kuva guta diki munguva pfupi inotevera kana zvichitaurwa. Parizvino Empress yava 'Growth Point' hombe kupfuura Zhombe-Joel inova ndiyo muzinda weruwa rweZhombe.


Mune chikoro chedzidzo yepasi chinonzi Mopane Primary School, uye vapedza paMopane vanogona kuenda kuNyaradzo neSidakeni Secondary Schools, [9] zvikoro zviri pedyo nomusha uyu.


Nzvimbo yemabhizinisi inovimba neEmpress Mine Township parizvino ndeye Columbina Rural Service Center iyo inozikanwa se 'Machipisa' nevemuEmpress Mine Township asi vapfuuri ndipo pavanoti paEmpress nokuda kokuti ndipo panomirira mabhazi nemaKombi anotakura vanhu vese vepaEmpress Mine Township. Zvinoratidza kuti nokuenda kwenguva Columbina Rural Service Center ichamedzwa neEmpress Mine Township nokuti inongova 4km chete kubva kumaCAMMERA kusvika pa Machipisa sekudaidzwa kwapanoitwa.


Mumusha weEmpress ndimo mune kambha yemapurisa inonzi 'Zhombe Samambwa ZRP Base' uyewo pava nemahofisi aRegistrar General [10] zvokuti zvitupa netsamba dzikuzvarwa kwevana dzava kungotorerwa pedyo nemisha yeveruzhinji muruwa rweZhombe East.


Pane zvoutano; pane kiriniki (clinic) iri munharaunda yechikoro chevarimisi, asi inobatsira vanhu vese zvavo vemuEmpress pamwe nevemumisha yakakomberedza. Hurapi huri apa ndewe mhando yokumaguta makuru. [11]


Tarisaiwo





References

  1. ↑ Salagushle is a populated area http://zw.geoview.info/salagushle,881753
  2. ↑ Salakuhle (Salagushle) http://zw.geoview.info/salagushle,881753
  3. ↑ Empress Nickel Mine establishment http://www.onemine.org/ search/summary.cfm/ Hydraulic-Sandfilling- to-Improve-Stability- at-Empress-Nickel- Mine-d=4439814DC278253380F1379BF6AD6D4879D148908F66C739910D4911850F407929453
  4. ↑ RioZim _ It was set up initially to develop and mine the Empress Nickel deposit | http://www.riozim.co.zw/
  5. ↑ The refinery, situated in Eiffel Flats in Kadoma, was built in 1968 to refine metal from Empress Nickel Mine and was closed when Empress Nickel Mine closed shop in 1982. | https://web.archive.org/web/20151101024801/https://groups.yahoo.com/neo groups/zimsite/conve rsations/messa ges/28691
  6. ↑ Rio Tinto Agricultural College http://www.egfar.org/organi zations/rio-tinto-agricultural-college
  7. ↑ Ngondoma dam location https://web.archive.org/web/20151206192846/http://www.geonip.com/ geolocation/ngond oma-dam-midlands- zimbabwe/7394828#
  8. ↑ Flora Zimbabwe http:// www.zimbabweflora.co.zw/ speciesdata/utilities/ utility-display-records- by-person.php?person_id=340
  9. ↑ Empress Ward Schools_ https://web.archive.org/web/20160316140754/http://www.parlzim.gov.zw/ attachments/ article/136/Zhombe.pdf
  10. ↑ Registrar General Sub-offices at Empress Mine https://web.archive.org/web/20140315025300/http://www.rg.gov.zw/ offices/midlands/kwekwe
  11. ↑ Empress Ward Health facilities _ https://web.archive.org/web/20160316140754/http://www.parlzim.gov.zw/ attachments/ article/136/Zhombe.pdf
Nyukura kubva ku "https://sn.wikipedia.org/w/index.php?title=Empress_Mine_Township,_Zimbabwe&oldid=110150"