Kunaya kweMvura

Chinyorwa chino chinotaura pamusoro pekuturuka kwemvura ichibva kudenga kuuya pasi nemutowo wekuturuka kwemvura.

Munhuruka ndiyo nguva inotanga mwaka wekunaya kwemvura, painotanga kuturuka.

Mhando dzekuturuka kwemvura

Mvura inenge yabundira iri mudenga inoturuka kubva mudenga nenzira dzakasiyana-siyana. Mudunhu reAfrica kuturuka kuzhinji kwemvura tinokuona kuburikidza nekunaya kwemadonhwe emvura. Kuturuka kwemvura kunoitikawo nenzira dzinoti sinowo, mhute, chivhuramabwe nedzimwe mhando dzinoonekwa kunyika dzinotonhora.

Kunaya kwemvura - uku ndiko kunaya kwemadonhwe emvura inonaya padunhu zvose nepagungwa; chikamu chizhinji chemvura chinonaya padunhu. Iyi ndiyo mhando yekuturuka kwemvura kwatinoona kazhinji muAfrica.

Sinowo (Snow)- sinowo inoturuka munzvimbo dzinotonhora zvakanyanya. Kazhinji sinowo inoturuka kana kuri kutonhora zviri pa 0^o celsius zvichidzika, panova ndipo panogwamba mvura kuita magodo echando. Sinowo zhinji inonaya kunyika dzinotonhora dziri kuEurope, Asia, neNorth America. Mazaya echando anowanikwawo munzvimbo dzakakwirira zvakanyanya segomo reKilimanjaro kuKenya nekumakomo makuru ari kuChile kuSouth America.

• Chivhuramabwe (Hailstorm) - iyi imvura inoturuka ichidonhedza tumagodo twemvura yakabundira nechando. Mune dzimwe nzvimbo chivhuramabwe chinoparadza zvirimwa chichiparura mashizha ezvirimwa.
• Dyorazhangare, dumbutsashanga kana bwanyashanga (Last heavy rain of the season).
• Kufesa (to rain lightly) zvichireva kupfunha.
• Musakasaka, bokora, mapokora, bokoza, mvura yehore, musoko, mushoko (shower of rain) zvinoreva kunaya kwemvura zhinji.
• Mubvumbi kana guti (persistent drizzle, thin shower, wet mist) zvinoreva mvura inorambonaya isingapi nguva yekukasa. Kana mvura ichipfunha seizvi kunonzi kuri kubvumba, kune mubvumbi kana kuri kupfunha. Mwedzi waKubvumbi mvura yemubvumbi yainaya kunyanya.
• Boporodzi kana bupurudzi (heavy rain with wind) apa kureva mvura inonya zvakasimba uye ichiuya nemhepo.
• Munakamwe, bumharutsva kana gukurahundi (early rains, first rains)
• Kugasa, kukasa, kugashuka, kudzimuka kana kuganhuka (cease to rain) mazwi anotaurwa achireva kuti mvura yambomira kunaya asi uchiri mwaka wekunaya kwemvura.
• Kupurana kana kudodoma (to rain heavily). Dodoma.
• Kupurwa nemvura (to be drenched in rain).
• Matsvoti (1. Abundance of liquid, 2. Very heavy rain). tsvoti.

Kurerutsa Mutauro

• Akadzamba mvura: he took shelter from the rain.
• Kuyeuka bako wanaiwa.
• Kutarama kwemvura (Delay of the rains).

Tsumo

• Kuyeuka bako waniwa. Remembering where the cave for hiding from the rain is after you are already wet.

• Kushaya hakunenerwi munhu denga ratarama. Nobody is to blame for poor yields when the sky has not given rain.

Mitauro yeChiBantu

• VaChewa vanoti ku vumba (v. rain) kureva kunaya kwemvura. VaTonga vanoti amuka (to lessen - of rain) vachireva kukamuka kwemvura.
• VaHerero vanoti ombura (rain) kureva mvura yekunaya. VaMaconde vanoti imbula (rain) kureva mvura yekunaya. Chopi vanoti kuna (v. to rain) kuna kwemvura.
• VaMakua vanoti ipura (rain) kureva mvura yekunaya. Basotho neBatswana vanoti pula (rain) kureva mvura yekunaya.
• VaKongo vanoti mvula (rain) imvura yekunaya. VaNyungwe vanoti mbvula (n. rain) imvura yekunaya. Xilenge vanoti kugamuka kureva kukasa kwemvura.
• VaLozi vanoti -kala (v.i. to cease raining) kukasa. Sokuti Pula i kalile (the rain has stopped). VaNyaturu vanoti mbua (n. rain) kureva kunaya kwemvura.